DHIMITËR GJOKA, TË JAPËSH LAJMET NË 36 SHKRONJA SHQIP

Shkruar nga Anisa Pëllumbi
e enjte , 06 mars 2008

Këtë vit bën 35 vjet në gazetarinë shqiptare. E ka nisur në vitin 1973, fillimisht si drejtues emisionesh në Radio-Tirana. Ndërsa sot është një nga ikonat dhe yjet e gazetarisë shqiptare. Veçantia e tij është zëri, që e ka të trashëguar nga gjyshi i tij nga nëna, i cili këndonte mjaft bukur, por edhe gjyshi nga babai, i cili i kishte mësuar të recitonte poezitë e Eseninit. Ka fituar një sërë çmimesh, Medalje të Artë si folës, Antena e Artë në 40-vjetorin e TVSH, si edhe një çmim në Assisi të Italisë për dokumentarin e tij “O Jeto”.
Ka dy fëmijë, Enean dhe Anën. Hobi i tij është noti, ndërsa gazetarinë, profesionin e tij, nuk do ta ndërronte me asgjë tjetër. Gjoka është sot personazhi ynë në 36 shkronja.



A ANA. Është emri i vajzës së Dhimitër Gjokës, e cila është në klasën e tretë.

B BASHKËPUNIME. Dhimitër Gjoka ka pasur edhe një sërë bashkëpunimesh gjatë karrierës së tij si regjisor dhe si folës.

C CILËSITË. Është një nga folësit më të mirë të gazetarisë shqiptare, dhe kjo falë cilësive të tij, ku natyrisht spikat zëri.

Ç ÇMIMET. Dhimitër Gjoka ka fituar një sërë çmimesh, Medaljen e Artë si folës në Festivalin e 6 të Dokumentarëve, Antena e Artë në TVSH, etj.

D DREJTOR ARTISTIK I TVSH. Ky ka qenë një nga postet që Dhimitër Gjoka ka pasur në vitin 1997.

DH DHIMITËR. Ky është emri i folësit të televizionit “Top Channel”

E ENEA. Djali i tij quhet Enea dhe këtë vit është maturant.

Ë ËSHTË e gjatë eksperienca e Dhimitër Gjokës në fushën e gazetarisë dhe regjisë.

F FESTIVAL. Ai ka qenë edhe prezantues festivalesh në Radiotelevizionin Publik Shqiptar.

G GAZETAR. Ky është profesioni që ai dashuron me gjithë shpirt dhe që e ka të pamundur të përcaktojë se çdo të bënte tjetër nëse nuk do të ishte gazetar.

GJ GJYSHËRIT. Në një intervistë dhënë për “Tirana Observer”, Gjoka është shprehur se zërin e tij e ka të trashëguar nga gjyshi nga mamaja, i cili këndonte mjaft bukur.

H HIPNOTIZUES. Ndoshta kështu mund ta quajmë folësin e “Top Channel”. Për shkak të mënyrës së veçantë të tij të raportimit të lajmit, i mbërthen të gjithë para ekranit.

I IKONË. Gjoka është një nga ikonat e folësve shqiptarë.

J JUBILE. Këtë vit Gjoka feston 35-vjetorin e punës së tij. Ai ka nisur në RTSH në vitin 1973.

K KËSHILLI DREJTUES I RTSH. Dhimitër Gjoka ka qenë anëtar i Këshillit Drejtues të RTSH-së në vitin 1997.

L LAJMET. Kjo është puna e përditshme e Gjokës, prezantimi dhe dhënia e lajmeve për publikun.

LL LLOJSHMËRIA. Lajmet janë të ndryshme, politikë, kronikë, kulturë, sport dhe në secilin prej tyre folësi i “Top Channel” ia del për mrekulli të jap secilën nga lajmet me veçantinë e tyre.

M MIRËMBRËMA SHIKUES...Kjo është një shprehje që dëgjohet prej vitesh, dhe menjëherë të vete mendja se tek “Top Channel”, Dhimitër Gjoka po jep edicionin e lajmeve.

N NOTI. Ky është një nga pasionet e Dhimitër Gjokës, që natyrisht nuk e lë pas dore edhe gjatë kohës së tij të lirë.

NJ NJERËZIT. Në pamje të parë ndoshta të jep përshtypjen e një njeriu të sertë, por ama Dhimitër Gjoka ndjen dhembje apo gëzim për lajmin të cilin është duke transmetuar.

O O JETO. Është dokumentari i realizuar nga Dhimitër Gjoka. Për këtë ai ka fituar çmimin “Lux Clarior” në Assisi të Italisë.

P PËRVOJA. Dhimitër Gjoka mban mbi supe 35 vite punë në fushën e gazetarisë dhe kjo e bën një nga veteranët e gazetarisë shqiptare.

Q QETËSIA. Kjo është dhe një nga virtytet e tij dhe ashtu siç thotë dhe vetë, asnjëherë nuk duhet të transmetosh të publiku shqetësimet apo gëzimet e tua.

R REGJIZOR. Është një tjetër profesion i Dhimitër Gjokës. Ai ka realizuar një sërë dokumentaresh dhe ëndrra e tij është të realizojë dhe një film artistik.

RR RRALLË. Dhimitër Gjoka shumë rrallë mund të bëjë ndonjë lapsus, ndërsa gafë nuk ka ndodhur asnjëherë në punën e tij.

S SPIKER. Është profesioni të cilin e kryen me aq pasion.

SH SHQIP. Është tepër i rregullt gjatë përdorimit pastër të gjuhës shqipe gjatë dhënies të edicionit të lajmeve.

T TVSH. Është televizioni ku Gjoka ka punuar për vite e vite me radhë.

TH THINJAT. Edhe pse thinjat kanë hedhur tisin e tyre në flokët e tij, së bashku me përvojën e tij, ato e bëjnë edhe më të pamshëm.

U USTA. Dhimitër Gjokën mund ta quajmë një “usta” të mirë të profesionit të vetë, madje shpesh edhe këshillon folësit më të rinj.

V VEÇANTIA. Edhe pse lajmi mund të jetë çfarëdo, kur thuhet nga Dhimitër Gjoka, merr mbi vete një interes të jashtëzakonshëm.

X XIXËLLUES. Gjithnjë është xixëllues gjatë daljeve të tij në edicionet e lajmeve.

XH XHIRIM. Edhe kjo ka qenë pjesë e punës së tij, gjatë xhirimeve të dokumentarëve.

Y YLL. Është një nga yjet më të spikatur të gazetarisë shqiptare.

Z ZËRI. Kjo është edhe cilësia më e madhe e Gjokës, që i jep më tepër rëndësi lajmeve.

ZH ZHDËRVJELLTËSIA. Pa dyshim që është një veçanti e tij. Shumë rrallë mund të ndodhë të bëjë lapsuse.